Shefja e Grupit Parlamentar të Lëvizjes Vetëvendosje, Mimoza Kusari-Lila u ka shprehur ngushëllime familjes së gruas e cila u vra sot në Pejë.

Me anë të një postimi në Facebook, ajo tha se kjo është alarmante dhe tregon për çrregullim të rëndë social, shkruan Arbresh.info.

“Viktima e dytë e femicidit në Kosovë brenda pak ditëve, nga Ferizaji në Pejë.  Viktima e sotme prapë e vrarë nga bashkëshorti në shtëpinë e saj. Kjo është alarmante dhe tregon për çrregullim të rëndë social dhe një rrugë tranzicioni pa mekanizma sigurues në shoqërinë tonë në rrugëtimin drejt barazisë.”, ka shkruar ajo.

“Numër alarmant i burrave në shoqëri po e konsiderojnë të drejtën absolute deri në vrasje, ndaj gruas dhe kjo kërkon trajtim serioz në të gjitha nivelet.”, shtoi ajo.

Më tej, ajo tha se dënimi maksimal është minimumi për vrasësit.

“Denimi maksimal është minimumi për vrasësit, ndërsa trajtimi i normave shoqërore në thelbin e tyre duhet rishikuar dhe ridefinuar.”, tha mes të tjerash Kusari-Lila.

“Nuk mund të humbim vajzat dhe gratë ndaj dhunës së pakontrollë që po shpërfaqet brutalisht çdo ditë e më shumë.”, tha mes të tjerash ajo./Arbresh.info/